تسليم الملف والاوراق المطلوبه وكتابه البيانات وكل مايخص التقديم فى معهد معاونى الامن /الشرطه المصريه /تفاصيل التفاصيل.
هنتكلم بالتفصيل عن تسليم الملف والاوراق المطلوبه وكيفبه استخراجها .
فى البدايه ركز معايا جدا عشان فى ناس كتير بترجع اكتر من مره واتنين وثلاثه وملفاتهم بتترمى فى وشهم بسبب الاوراق الى مش كامله والغلطات الى بتكون فى الملف .
اولا» كتابه البيانات .
بيكون معاك ملف كبير وكراستين تحريات صغيرين .
هتاخدهم وتطلع على المكتبه تصورهم من الجلده للجلده نسختين او ثلاثه .
هتركن الاصلى وتستخدم الى انت مصورهم .
هتمسك الملف الكبير اقرئه بالتفصيل وافهم كل كلمه واول الملف كله تعليمات وارشادات لملئ البيانات افهمها كويس .
بعد كده هتبتدى تملا البيانات الى مطلوبه منك فى النسخ الى انت مصورها بتكون بيانات عنك وعن والدك ، والدتك،
جدك من الوالد ،جدتك من الوالد، جدك ابو والدتك ،جدتك ام والدتك .
الى ذكرتهم فوق دول بتكون بيانات شخصيه دقيقه يعنى الاسم والرقم القومى والعنوان بالتفصيل والعناوين القديمه لاى حد منهم كان ساكن فى مكان وغير مكان سكنه ووظيفته ولو متجوز زواجات تانيه بيطلب منك بيانات الازواج دى .
طيب لو فى اى حاجه من البيانات دى وقفت عليا اعمل اى !
مثال : جدى متوفى ومش عارف اجيب رقمو القومى !
هتطلع على السجل المدنى بتاع المركز الى انت تابع ليه تمليه الاسم وهيجبلك البيانات الى محتاجها او تطلعلو شهاده وفاه .
اى بيانات بتكتبها لازم تكون اصليه من البطاقات الشخصيه للاشخاص المذكورين . يعنى اى !
يعنى مينفعش يكون الشخص اسمه احمد السيد مثلا وانت تكتبه احمد سيد الالف والام دول هياثرو معاك جامد سدقنى .
كمان مينفعش يبقا الشخص مؤهله اعداديه وانت تكتبه ان معاه دبلوم او اى حاجه تانيه انت مش اذكى منهم لان كل اسم بتكتبه بيتعمل عنه تحريات وبيعرفو اصله من فصله .
بتدخل بعد كده على بيانات الاقارب لحد الدرجه الرابعه الى هما كالاتى :
انت وابوك وامك واخواتك وجدودك .
اعمامك وعماتك وازواجهم ذكور واناث .
اولاد وبنات اعمامك وعماتك وازواجهم ذكور واناث .
اخوالك وخالاتك وازواجهم ذكور واناث .
اولا وبنات اخوالك وخالاتك وازواجهم ذكور واناث .
كل الناس دى لازم تتكتب بيانتهم الى فى بطايقهم الشخصيه بالتفصيل +لو هما شغالين فى شغل تانى غير الى مكتوب فى البطاقه بيتكتب برضوا وممنوعا منعا باتا اغفال اى حد من الناس دى لان التحريات هتثبت ده وهتثبت انت اغفلت الشخص ده لى .
كمان فى بند فى الملف خاص بالمراسل
باختصار لازم يكون عندك حد قريبك او معارفك من سكان القاهره بتكتب بياناته وعنوانه وارقام تليفوناته عشان يتواصلو بيه فى حاله انهم بعتولك
فى اى وقت وانت مرديتش مثلا .
كمان فى الملف بعض الاقرارات لازم تمضى عليها انت ووالدك ذى مثلا اقرارات انك مش متزوج ولا سبق لك الزواج ولا هتتزوج الا بعد التخرج ان شاءالله واقرار موافقه ولى امرك انك تقدم فى المعهد واقرار ان البيانات الى انت كاتبها كلها صحيحه والاوراق الى انت مقدمها مظبوطه وعلى مسؤليتك الشخصيه واشياء من هذا القبيل .
طيب لو فى صفحه من الصفحات اتملت وانا بكتب بيانات معينه ذى مثلا اولاد خالتك ، متنساش انك مصور الملف كذا نسخه قبل متكتب فيه حاجه بتجيب ورقه من الى انت مصورها وتكمل فيها البيانات عادى وتدبسها فى الصفحه الاصليه فى الملف او تجيب ورقه خارجيه وتصورها وتكتب فيها وتدبسها برضو عادى مفيهاش مشكله .
خطك ثم خطك ثم خطك لازم تحسن خطك وتكتب بخط ايدك .
تبتدى تطبق كل الى انت عملته ده فى الملف الاصلى وكراستين التحريات واى حاجه من المطلوبه لو مش مكتوبه اكتب لايكن . وركز تجنبا للشخبطه وانت بتكتب ولازم البيانات الى فى كراسات التحريات تكون مطابقه بالحرف للبيانات الى فى الملف الاصلى .
ده كل مايخص البيانات والكتابه لو فى حاجه واقفه عليك فى الاختبارات او اى حاجه اكتبها فى التعليقات وانا هرد عليك .
نيجى بقا للاوراق المطلوبه .
شهاده ميلاد اصليه .
صوره بطاقتك.
شهاده الاعداديه او مايعادلها .
ولو معرفتش تجيبها تروح الاداره التعليميه بتاعه بلدك تطلب منهم مستخرج رسمى للشهاده الاعداديه بتاعتك ويكون مكتوب فيه موجه الى معهد معاونى الامن .
صوره اخر مؤهل حاصل عليه ، ثانويه عامه ، دبلومات ، كليه ، معهد ، الخ ...
قيد عاءلى لوالدك ،وده بتروح السجل المدنى ومعاك شهادات ميلادك انت واخواتك ووالدك ووالدتك وقسيمه جوازهم والى متوفى تجيبله شهادت وفاه وميلاد . كله صور مش اصل وبتسلمهم لموظف السجل بيعمل الاجراءات اللازمة وبيطلعلك القيد حاول تعمل منه 2او 3عشان هتحتاجه بعدين .
فيش جناءى ، وده بيطلع من قسم الشرطه بالبطاقه وهيسالك عاوزه ليه عشان يكتبلك فيه موجه الى معهد معاونى الامن .
12 صوره 4فى 6خلفيه بيضه .
شهاده الجيش، طيب لو انت لسا بتدرس بتروح الكليه او المعهد الى بتدرس فيه تقولهم عاوز اثبات قيد ان بدرس هنا ويكون مكتوب فيه الرقم الثلاثى بتاع التجنيد ويكون مكتوب فيه موجه الى معهد معاونى الامن ولو خلصت دبلوم مثلا ولسا ميعاد جيشك مجاش روح منطقه التجنيد الى فى محافظتك قولهم عاوز موقفى من التجنيد ولو ميعاد جيشك جه انصحك متكملش تقديم فى المعهد وروح قضى جيشك الاول عشان مش هتقبل .
صوره من مؤهلات الوالدين ولو ممعاهمش مؤهلات عادى
صوره من الاصل لو عندكم املاك .
مفردات مرتب والدك ووالدتك لو هما موظفين لو لا عادى .
لو والدك مش موظف بتجيب ورقه من مجلس المدينه بتاعكم ان والدك مش موظف حكومى ويكون اتنين موظفين هناك يشهدو و يمضو عليها ويختموها بختم النسر.
لو عندكم اراضى زراعيه تروح الجمعيه الزراعيه تجيب ورقه تثبت ملكيه الاراضى دى .
لو معاك رخصه سواقه او شهادات وبطولات رياضيه او شهادات خبره فى اى مجال احترافى قدم صور المستندات دى هتنفعك وهتزود فرصك فى القبول .
بتجمع كل الاوراق دى والملفات بعد متراجع مره واتنين وثلاثه على البيانات وتحطهم فى فايل متدبسش الاوراق دى فى الملف هما هيدبسوها هناك وتخدهم وتطلع على المعهد فى الميعاد بتاعك اليوم ده هيطول يعنى اعمل حسابك فى فلوس بزياده عشان تاكل هتروح تسلم بطاقتك وتستنى دورك هيتنده عليك تروح تقعد قدام الضابط هيراجع معاك الملف والكراستين ويطابقهم ببعض ويراجع الورق لو كله تمام بيستلمهم منك و بتمضى وتاخد ميعاد الاختبار الرياضى وتروح لو فى مشاكل او حاجه نقصها بيقولك تعمل اى وتكملها اذاى وبيقولك على ميعاد تانى تيجى فيه تسلم الملف بعد متكمل الى ناقصك .
كده يبقا وصلنا لنهايه اليوم ده ياارب اكون قدرت افيدكم ومحتاج دعواتكم من قلبكم ولو عندك اى استفسار اكتبه فى التعليقات وانا هرد عليك
انتظرو شرح كامل ومفصل( للاختبار الرياضى )
تعليقات
إرسال تعليق