الكشف الطبى بمعهد معاونى الامن وكيفيه الاستعداد له /تفاصيل التفاصيل.

السلام عليكم ورحمه الله وبركاته.

اذاى تستعد للكشف الطبى ؟

اولا نظافتك الشخصيه مهمه جدا .

تخفف شعرك ، تحلق دقنك ،تحلق شعر الابط والعانه.

لو تعرف تروح تغسل ودنك واسنانك عند دكتور روح لو مش عاوز مش مشكله المهم تهتم بنظافه جسمك كله من اول شعر راسك لحد صابع رجلك الصغير .

»اى هى الحجات الى ممكن تسقطك فى الكشف الطبى ؟

العمليات الجراحيه ، العمليات الى فى العظام والتقوس المبالغ فيه ، ضعف النظر ، العاهات المستديمه، البواسير ، الامراض الجلديه ، مشاكل وامراض القلب ، الاسنان المخلوعه او المكسوره لو بتضر بطريقة نطقك ، اللته .

لازم تشوف اى حاجه من الحجات دى لو موجوده فيك وتعرف تعالجها عالجها قبل الكشف .

»اى الى بيحصل في اليوم ده ؟

حضرتك بتروح فى ميعادك ومعاك كارت التردد و3صور بطاقه والبطاقه و4صور شخصيه 4فى 6خلفيه بيضه .

بتدخل المعهد بتقف مع زمايلك بيجى واحد يقسمكو مجموعات كل مجموعة 20واحد لازم تحفظ رقم مجموعتك وبياخدكم جوه بتقلع هدومك وتفضل بالشورت بس وتبتدى رحله الكشف الطبى تابع معايه كل عياده بالتفصيل 👇

»الاشعه ودى سهله جدا بتخش تحط صدرك على الجهاز بيصور اشاعه على صدرك وبتخرج الموضوع مبياخدش 30ثانيه.

»التحاليل ، بتاخد امبول وتدخل الحمام تحط فيه عينه من البول بتاعك وتخرج تفضل ماسكو فى ايدك والدكتور بيجى يحطلك فيه شريط اختبار ويسيبه حوالى دقيقه وبعدين بيرجع يشيله ويبص على الشريط بيشوف نسبه الاملاح والسكر .

عياده العظام ، ودى من اهم العيادات لانك بتدخل تقف الدكتور بيبص على جسمك كله وبيقولك ارفع ايدك ونزلها واقف على رجل واحده افتح صوابع واقفلها ضم رجلك وافتحها وحجات من هذا القبيل .



»عياده القلب ، وهنا لازم متتوترش وتكون هادى جدا واوعى تخاف لان الدكتور بيجى يكشف على قلبك بالسماعه وطبعا لو اتوترت ضربات قلبك هتزيد وهيكتب ملاحظه انك عندك تسارع في نبضات القلب .

»عياده النفسيه ، وهنا الدكتور بيخليك تقول جمل معينه عشان يشوف اللته فى الحروف الى عندك ذى مثلا (امر امير الامراء بحفر بئر فى الصحراء ) وبيخليك تقف على طراطيف صوابعك وتغمض عينيك وبتمد ايدك قدامك عشان يشوف اعصابك وحجات من القبيل ده.

»عياده النظر ، بتدخل تقعد على كرسى وتحط ايدك على عينك الشمال والدكتور بيشاورلك على دايره معينه من اللوحه الى قدامه وانت تقوله مفتوحه منين يمين ولا شمال ولا فوق ولا تحت وبعد كده بتغير وتحط ايدك على عينك اليمين وتعمل نفس الموضوع وبتقوم طبعا الكشف ده غنى عن التعريف وكل الناس عارفاه بس فى ملحوظه وانت حاطط ايدك على عينك متتضغطش عليها عشان لما تفتحتها تعرف تشوف اللوحه حلو للعم انك بيكون بينك وبين اللوحه مسافه حوالى 4متر او 5 وممكن الدكتور يختارلك دايره صغيره جدا يعنى ركز كويس .

»عياده الجلديه ، بتدخل الدكتور بيبص على جسمك وبيشوف العاهات المستديمه والامراض الجلدية .

»عياده الاسنان والانف والاذن والحنجره، الدكتور بيعدى عليك بيقولك افتح سنانك واقفلها وبيشوف تطابق الاسنان على بعضها والاسنان المكسوره والمخلوعه والمسوسه ودكتور تانى بيشوف ودانك يمين وشمال والانف .

»عياده الجراحه ، حضرتك بتدخل ورا ستاره متتحرجش من حاجه ومتاخدش الموضوع بهزار عشان محدش يحرجك الدكتور بيقولك نزل الشورت بيكشف عليك ورا وقدام بالنظر بس بعدها بتلبس وتخرج الموضوع مبياخدش دقيقه .

»واخيراا عياده العرض العام ، ودى الفينش بتاع الكشف الطبى بتدخل بتمشى على سيجاده حمرا لحد اخرها وبتقف فى نص العياده الدكتور بيتابع خطوات مشيتك وطريقه نطقك وتناسق جسمك وممكن يعيد الكشف عليك فى اى حاجه من الى ذكرتها من العيادات الى فوق وبيبص على الورق بتاعك يشوف دطاتره العيادات الثانيه كتبو عنك ملاحظات ولا لا و بياخد القرار اذا كنت لائق او غير لائق .

بعدها بتخرج تلبس هدومك وتستنى بره لحد الضابط ميجى بيقولكم النتيجه والى ساقط بيروح والى ناجح بيعرف ميعاد الكشف الجاى والتعليمات الى هيلتزم بيها فى اليوم ده .

انتظرو تفاصيل كشف الاتزان النفسى كامله .