السلام عليكم ورحمه الله وبركاته.
(اختبار القوام )
الى بيحصل فى اليوم ده كالآتي ،
حضرتك بتروح المعهد الى سحبت منه الملف فى اليوم الى اتحددلك بتكون حالق شعرك نمره1 وحالق دقنك وشعر الابط والعانه بتكون هناك 7صباحا وتاخد معاك البطاقه وكارت التردد وتصور البطاقه 10صور وتخليهم فى محفظتك عشان هيطلبومنك فى كل اختبار صوره بطاقه او اتنين ويكون معاك 12صوره شخصيه حجم4فى 6 خلفيه بيضه عشان برضوا هيطلبو منك فى كل اختبار صوره او اتنين
بتقف فى طابور قدام بوابه المعهد مع زمايلك وبتتفتش على البوابه والظابط بيشوف بطاقتك وكارت التردد وبعدين بتدخلو جوا تقفوا طوابير والضابط بياخد منكم البطايق ويقسمكم مجموعات كل مجموعة 20 واحد وكل مجموعه بيكون ليها رقم بعد كده اول مجموعه بتدخل اللجنه وهكذا لحد ميجى دور مجموعتك هتقلع هدومك وتفضل بالبوكسر يكون واسع او شورت ابيض وبتقفو طابور قدام اللجنه وبتدخلو بالترتيب هيتنده على كل واحد باسمه .
اول متسمع اسمك تدخل للدكتور هيقيس عرض صدرك بالدوران مع ضهرك بالمتر الى معاه بعد كده بتقف ع الميزان يقيس وزنك وبعد كده بتقف جنب مسطره طويله بيقيس بيها طولك .
بعد كده بتخرج بره تلبس هدومك و تقعد مع مجموعتك وتستنى لحد متسمع النتيجه .
وبيكون في كانتين لو عاوز تفطر او تشرب حاجه .
والنجاح فى الاختبار ده بيكون متوقف على تناسق جسمك بمعنى ان شرط طولك ميقلش عن 170سم لو انت شاب و160 للبنات وعشان الوزن يكون متناسق مع الطول اطرح 100من طولك بمعنى ان لو طولك180سم مثلااطرح 100 يبقا الوزن المناسب 80كيلو عشان يبقا جسمك متناسق ومسموح 10كيلو فوق او تحت الوزن وبالنسبه للذكور لازم عرض صدرك بالدوران مع ضهرك ميقلش عن 85 سم .
بعد كده الضابط بيخرج وينده الاسامى الى محصلش ليهم نصيب وسقطو فى الاختبار ويروحهم .
بعد كده بينده الناجحين بيقفو طابور ويديهم التلقينات والتعليمات الخاصه بالاختبار الى بعد كده وهو (الكشف الطبى ) وبيقول على الميعاد واليوم الى هتيجى فيه تكتبه فى كارت التردد الى مع حضرتك وبيتم انصرافك من المعهد وكده يبقا حضرتكم عرفتو اى الى بيحصل في اختبار القوام بالتفصيل انتظروا شرح اختبار (الكشف الطبى بالتفصيل)
تعليقات
إرسال تعليق