شرح ونصائح هامه لكشف الهيئه بمعهد معاونى الامن/ تفاصيل التفاصيل.

السلام عليكم ورحمه الله وبركاته.

كشف الهيئة (لجنه الاختيار)

لو عاوز تجتاز الكشف ده بكل سهوله اسمع النصايح دى واعمل بيها لوجه الله .

الكشف ده من اهم الاختبارات الى هتمر بيها لانه تحديد المصير .

كشف الهيئه بمعهد معاونى الامن مبيطلبش منك لبس معين للاختبار ولكن يستحسن أن تلتزم بالبس الأساسى وهو :

قميص ابيض ساده ،بنطلون بدله اسود ساده ، حزام جلد اسود ساده ، جزمه جلد كلاسيك اسود ساده .

وتروح لترزى يظبطهملك على مقاسك وتكويهم كويس وتحطهم فى شنطه وتاخدهم معاك ومتلبسهمش غير هناك ومتقلقش فى وقت واماكن لللبس .

لازم فى اليوم ده تكون نايم كويس جدا عشان تكون فايق ومركز .

الى بيتم فى اليوم ده كالاتى 👇

حضرتك بتروح فى اليوم والمعاد المحدد ليك ولازم تلتزم بالمواعيد ومبتغيبش .

هتدخل المعهد تسلم بطاقتك للضابط وتستنى تسمع اسمك وتدخل فى الطابور مع زمايلك بعد كده الضابط هياخدكم على المبنى الى فيه لجنه الهيئه .

هتروح تقعد فى قاعه تلبس هدومك وتستعد كويس والضابط هيديكم التعليمات وهيعرفك تعمل اى وتدخل منين وتخرج منين .

بعد كده بتتقسم مجموعات كل مجموعه 10طلاب والضابط بياخدكم يوديكم عند لجنه الهيئه اول لما يجى دورك الضابط هيكون واقف قصادك على الباب  هينده اسمك ترد عليه بصوت عالى يهز القاعه (افندااام)

بعد كده هتدخل تمشى على سيجاده حمرا لحد متوصل لدرجه عاليه عن الارض على شكل صندوق خشب هتطلع تقف عليها ،تشد نفسك وتفتح رجلك سابعه وايدك تكون خلف خياطه البنطلون .

تقف راجل كده واثق من نفسك مش مهزوز ومش معوج ، هيكون قاعد قدامك مجموعه من الساده  الضباط ويتراسهم لواء ، هيبتدى يوجه ليك اسئله ، محدش يقدر يقولك عن الاسئله دى لانها مش ذى بعضها هو الى بيجى فى دماغه ساعتها بيسالهولك ، ممكن يسالك عن حد فى قرايبك ، ممكن يسالك والدك بيشتغل اى ،انت بتدرس اى ، وبيكون فى شاشه وراهم هيجيبلك عليها جمله ويقولك اقرءها .

اهم حاجه ترد بثقه فى النفس على اى سؤال وتخلى نبره صوتك مسموعه ومش مهزوزه وفى نفس الوقت ميكونش صوتك عالى لدرجه الزعيق يعنى نسق نفسك ومتخافش من حاجه وحط فى اعتبارك وانت داخل انك داخل لناس بشر ذيك ذيهم وانهم محتاجينك اكتر ما انت محتاجهم .

بخلاف كل ده ممكن ميكلمش اساسا ويقولك اتفضل يابنى وده مش معناه انك سقط .

بعد مبتخلص بيقولك اتفضل وبتخرج من باب تانى غير الى انت داخل منه ،بيكون الضابط الى بره مديك كل التعليمات والتفاصيل الى هتمشى عليها وتدخل وتخرج منين ،يعنى متقلقش ، 

وباكد عليك نام كويس قبل اليوم ده عشان تكون فايق ومركز .

بعد كده بتطلع القاعه الى كانت قاعد فيها بتغير هدومك وترتاح وتستنى لحد زمايلك ميخلصو الاختبار والضابط بياخدكم طوابير على بره المعهد وبتروح بتستنى مكالمه على الرقم الى انت كاتبه فى ملفك هيقولولك فيها مبروك نجحت هيئه وعندك طبى متقدم يوم كذا .

يارب اكون قدرت افيد حضراتكم ، اى استفسار اكتبه فى التعليقات وانا هرد عليك ، محتاج دعوه من قلبكم ، انتظرو شرح كامل ومبسط عن الكشف (الطبى المتقدم )بالتفصيل .